وروستی
د چاپېريال ساتنې ملي ادارې عمومي رئيس د زابل له والي سره وليدل
د چاپېریال ساتنې ملي ادارې عمومي رئيس شاه زمان ميوندي پرون وروسته له غرمې چې د جدي مياشتې له ۲۱ مې نېټې سره سمون خوري، په خپل کاري دفتر کې د زابل والي ښاغلي رحمت الله يارمل سره ولیدل.
په دې ليدنه کې د زابل ولايت چاپېريالي وضعيت او د دې ولايت د طبيعي او چاپېريالي ارزښتونو په تړاو خبرې اترې وشوې.
د چاپېريال ساتنې ملي ادارې عمومي رئيس وویل، چې د زابل په شمول د چاپېريال ساتنې ولايتي ادارو امکانات او آسانتياوې به تقويت شي، ترڅو په دې برخو کې لاسته راوړنې او مسووليت منل هم تقويت ومومي.
ښاغلي ميوندي د خپلو خبرو په ترڅ کې وويل: ولاياتو ته د ادارې د رهبرۍ د سفرونو په دوام، په پام کې لري زابل ولايت ته هم سفر وکړي، ترڅو د دې ولايت چاپېريالي وضعيت له نږدې وارزوي.
د ناستې په ترڅ کې د زابل والي دې ولايت ته د چاپېریال ساتنې په تړاو د يادې ادارې له ځانګړې پاملرنې څخه په مننې سره وويل، چې د دې ولايت سيمه ييزه اداره د همکارۍ لپاره بشپړ چمتووالی لري.
دا په داسې حال کې ده، چې د چاپېريال ساتنې ملي ادارې رهبري، د يادې ادارې د عمومي رئيس په شمول د روان کال په ترڅ کې د چاپېريالي وضعيت د ارزونې او په دې برخه کې د لازمو لارښوونو د صدور په موخه د هېواد څو ولايتونو، لکه: ننګرهار، باميان او پنچشېر ته سفرونه وکړل او د سفرونو دا لړۍ به همداسې دوام ولري.