وروستی
په کابل ښار کې د هوا د ککړوونکو سرچينو د تړلو لړۍ په دوام
د چاپېريال ساتنې ملي ادارې، کابل ښاروالۍ او امنيه قومندانۍ د شنبې ورځې په جريان کې، چې د مرغومي میاشتې ۲۱مې نېټې سره سمون خوري، د کابل ښار څلورمې، لسمې، يوولسمې، څوارلسمې او پنځلسمې ناحيو د مختلفو اصنافو د مرکز ګرميو او سونګ له سيستمونو څخه ليدنه او نظارت وکړ.
ياد پلاوي د هغو ۲۹ سيمو د مرکز ګرميو او سونګ سیستمونو د فعاليت د څرنګوالي څخه نظارت وکړ، چې د چاپېريال ساتنې ملي ادارې ته يې د خلکو لخوا شکايتونه رارسېدلي و. په دې سيمو کې حمامونه، لوړپوړيزې ودانۍ، رستورانتونه او د لابمو حوضونه شامل و.
د دې ارزونو په پايله کې د ۳ حمامونو، ۶ رستورانتونو، ۲ ښارګوټو او ۱۸ لوړپوړيزو ودانيو د مرکزګرميو او سونګ سيستمونو فعاليتونو څخه نظارت وشو، چې له ډلې يې يو حمام وتړل شو او له ۴ لوړپوړيزو دانيو څخه کتبي ژمنتیا واخيستل شوه، ترڅو ژر تر ژره د زهري او مضره ګازونو د فلتر دستګاوې نصب کړي؛ چې د سرغړونې په صورت کې به له جدي او قانوني چلند سره مخامخ شي.
د يادونې وړ ده چې، د نظارت او ارزونې دا لړۍ به همداسې دوام لري او له هغو تصديو سره چې سرغړونه وکړي، قانوني او جدي چلند وشي.