وروستی
په کابل ښار کې د هوا ککړوونکو سرچينو د تړلو په دوام
د مرغومي ۲۹مه ــ کابل
د چاپېريال ساتنې ملي ادارې، کابل ښاروالۍ او امنيه قومندانۍ ګډ پلاوي پرون شنبه د مرغومي په ۲۸مه نېټه د کابل ښار له درېيمې او څلورمې ناحيو اصنافو د سونګ سيستمونو څخه نظارت ترسره کړ.
ياد پلاوي چاپېريال ساتنې ملي ادارې ته د خلکو لخوا د رارسېدلو شکايتونو په اساس د (۲۴) سيمو له سونګ سيستمونو څخه چې په هغو کې حمامونه، لوړ پوړيزې ودانۍ، روغتونونه او رستورانتونه شامل دي؛ نظارت وکړ.
د دې ارزونو په پايله کې د يو حمام، اتلسو لوړپوړيزو ودانيو، يو روغتون او يو رستورانت د سونګ سيستمونو او مرکز ګرميو د فعاليت څرنګوالی وارزول شو، دوه لوړ پوړيزې ودانۍ وتړل شوې او د يوولسو نورو سيمو له مالکينو څخه ژمنه واخيستل شوه چې خپل سونګ سيستمونه به معياري کوي.
د يادونې وړ ده چې وروسته له نظارت او ارزونې څخه یوولسو نورو سيمو خپل سونګ سيستمونه او مرکز ګرمۍ اصلاح کړي دي.
د دې ارزونو او نظارت لړۍ به همداسې دوام لري او هغه تصدۍ چې سرغړونه وکړي، نو د قانوني او جدي چلند سره به مخامخ شي.