وروستی
د هوا ککړتیا د راکمولو او مخنیوي مقررې د تعدیل طرحه د کابینې له خوا تائید شوه
د افغانستان اسلامي جمهوريت ولسمشر جلالتمآب محمد اشرف غني په مشرۍ د کابینې په ۱۲مه غونډه کې د هوا ککړتیا د راکمولو او مخنیوي مقررې د تعدیل طرحه تائید او د عدلیې وزیر له خوا ولوستل شوه.
د چاپېریال ساتنې ملي ادارې عمومي رئیس شاه زمان میوندي د نوموړې طرحې د تعدیل دلایل وړاندې کړل او ویې ویل: د هوا ککړتیا د راکمولو او مخنیوي مقرره د لسو کالو راهېسې نافذه ده چې د وخت اړتیاوې او غوښتنې نه شي ځوابولی، د نفوسو ډېرښت او د هواککړتیا ورځ تر بلې زیاتېدو ته په کتو اړتیا وه چې د یادې مقررې ځینې مواد تعدیل شي.
عمده تعدیلات په لاندې برخو کې راغلي دی:
۱- د هواککړتیا د منابعو تفکیک او ډلبندي.
۲- د مخنیوي، محدودیتونو او مکلفیتونو وضع کول.
۳- د نغدي جریمو اضافه کول.
۴- د هوا ککړتیا د مخنیوي عالي کمیسیون په ترکیب کې بدلون.
په دغه طرحه کې ممنوعیتونه او مکلفیتونه په واضح او روښانه توګه بیان شوي چې د پلاستیک، ربړونو، ټایرونو او مستعملو مبلایلو سوځول منع شوي دي، همدا راز د لوړپوړیزو ودانیو، ښارګوټو، فابریکو، صنعتي او تجارتي ودانیو، بټیو او حمامونو مالکین مکلف شوي چې خپل سونګ سیسټمونه په معیاري فلترونو سمبال کړي او د موټرو مالکین هم مکلف دي چې د خپلو وسایطو تخنیکي معاینات ترسره کړي.
د چاپېریالي جرمونو لپاره نغدي جریمې وضع شوي او د هواککړتیا د مخنیوي عالي کمیسیون غړیتوب هم د وزیرانو کچې ته لوړ شوی چې د جلالتمآب ولسمشر په مشرۍ به ۱۶ وزیران پکې کار کوي او د چاپېریال ساتنې ملي اداره به یې د سکرتریت چارې پر مخ بیایي.
په پای کې د افغانستان اسلامي جمهوریت جلالتمآب ولسمشر محمد اشرف غني وینا وکړه او د چاپېریال ساتنې ملي ادارې مقررې د تعدیل طرحه یې تائید او نافذه وبلله.
د چاپېریال ساتنې ملي اداره د یادې طرحې تعدیل د هواککړتیا د راکمولو او مخنیوي په برخه کې مثبت ګام بولي او دې ته ژمنه ده چې د پلي کېدو لپاره به یې جدي هڅې کوي.