وروستی
د هېواد په کچه د نیالګیو کېنولو ملي کمپاین د ښه انسجام په موخه بحث ترسره شو
د کب ۱۷مه – کابل
د چاپېریال ساتنې ملي ادارې عمومي رئیس شاه زمان میوندي د کرنې، اوبو لګولو او مالدارۍ له وزیر نصیر احمد دراني سره لیدنه وکړه او دواړو خواوو د نیالګیو کېنولو ملي ورځې په تړاو د ولسمشر حکم د پلي کولو د څرنګوالي په اړه خبرې اترې وکړې.
ښاغلي میوندي د اړوندو ادارو تر منځ همغږي با اهمیته وبلله او ویې ویل: د چاپېریال ساتنې ملي اداره په دې برخه لازم چمتووالی لري، ده د ادارو ترمنځ په ښه انسجام ټینګار وکړ او د نیالګیو ملي کمپاین په اړه یې د جمهوري ریاست عالي مقام د حکم د پلي کېدو ډاډ ورکړ.
د کرنې، اوبو لګولو او مالدارۍ وزیر نصیر احمد دراني هم د ښه انسجام په رامنځته کېدو ټینګار وکړ او زیاته یې کړه چې د دې برنامې په تړاو باید ټول کارونه په ګډه او دقیق ډول ترسره شي.
د یادولو وړ ده چې د جمهوري ریاست عالي مقام د حکم پر بنسټ د کب ۲۰مه د نیالګیو کېنولو ملي ورځې په توګه ټاکل شوې او د ملکي خدمتونو او نظامي ادارو ټول کارکوونکي، محصلین او زده کوونکي د نیالګیو په کېنولو مکلف شوي دي، په دغه حکم کې د کېنول شویو نیالګیو د ساتنې او جدي مراقبت په اړه هم ټینګار شوی.