وروستی
په ټول هېواد کې د نیالګیو کېنولو ملي کمپاین پیل کېدل
د کب ۲۰مه – کابل
د چاپېریال ساتنې ملي ادارې د جمهوري ریاست عالي مقام حکم د پلي کېدو په موخه، نن سه شنبه د کب په ۲۰مه نېټه د کرنې، اوبو لګولو او مالدارۍ وزارت، د کلیو پراختیا او بیا رغاونې وزارت، کابل ښاروالۍ او اطلاعاتو او فرهنګ وزارت په ګډه همکارۍ د (یو افغان، یوه ورځ، یو نیالګي) شعار تر عنوان لاندې د حبیبیې عالي لېسې په کلا کې د شاندارو مراسمو په ترڅ کې په سلوګونو نیالګي کېنول.
د نیالګیو کېنولو په دغه ملي کمپاین کې د چاپېریال ساتنې ملي ادارې عمومي رئیس، شاه زمان میوندي، د کرنې، اوبو لګولو او مالدارۍ وزیر نصیر احمد دراني، کابل ښاروال پوهنیار احمد ذکي سرفراز، د دې ادارې او اړوندو ادارو معینانو، د چاپېریال ساتنې سفیرانو، د چاپېریال شبکې رضاکارانو، د مدني ټولنې غړیو، رئیسانو، د اړوندو ادارو کارکوونکو او یو شمېر خبریالانو ګډون کړی وو.
د چاپېریال ساتنې ملي ادارې عمومي رئیس شاه زمان میوندي په خپله پرانېسته وینا کې له ټولو اړوندو ادارو استازو څخه مننه وکړه چې د نیالګیو کېنولو ملي کمپاین کې یې برخه اخیستې وه، ده وویل: د هوا ککړتیا، د اقلیمي بدلون ناوړه اغېزې، د ځنګلونو او وحشي ژویو له منځه تلل، هغه ګواښونه دي چې زموږ هېواد ورسره مخ دی، د دې ستونزو د مدیریت لپاره د نیالګیو کېنول، ساتنه او پالل له اغېزمنو او ګټورو لارو چارو څخه دي.
ښاغلي میوندي وویل: د جمهوري ریاست عالي مقام د فرمان په اساس، د کب شلمه د نیالګیو کېنولو ملي ورځې په توګه نومول شوې ده او د نیالګیو د ساتنې او پالنې په پار د ټولو اړوندو ادارو او وګړو مسوولیتونه پکې په ګوته شوي دي. د ده په وینا یاده برنامه د یوه هدف په توګه پر مخ ځي او د کېنول شویو نیالګیو د څارنې او راپور ورکولو د څرنګوالي لپاره یې د چاپېریال ساتنې ملي ادارې داسې یو سیسټم جوړ کړي چې د کېنول شویو نیالګو ارقام او د ایښودلو ځایونه به معلوموي.
د کرنې، اوبو لګولو او مالدارۍ وزیر نصیر احمد دراني د ځنګلونو د اهمیت او پر چاپېریال یې د اغېزو په هکله وینا وکړه او ویې ویل: د نیالګیو په کېنولو او ځنګلونو جوړولو سره کولای شو چې د سیلابونو د زیانونو، هوا ککړتیا، اقلیمي بدلون او نورو چاپېریالي ګواښونو مخه ډب کړو. ده وویل: دا د هر وګړي مسوولیت دی چې د اکسېجن او غوره اقتصاد درلودلو په پار نیالګي کېنوي او په سمه توګه یې ساتنه او پالنه وکړي.
ښاغلي دراني وویل: موږ سږ کال پلان لرو چې په ټول هېواد کې ۲میلیون نیالګي وکرو.
کابل ښاروال احمد ذکي سرفراز د زرغونو سیمو او پارکونو د پراختیا په هکله وینا وکړه او ژمنه یې وکړه چې په کابل ښار کې به د غونډیو، پارکونو او ساتل شویو سیمو په سمه توګه مدیریت او د اوبو کولو لپاره به ورته قطره ییې سیسټم جوړ کړو.
د یادولو وړ ده چې د جهوري ریاست عالي مقام حکم د تطبیق په موخه په ټول هېواد کې د نیالګیو کېنوالو کمپاینونه ترسره شوي دي چې په تفصیل به یې راپورنه خپاره شي.