وروستی
جلالتمآب جمهور رئیس محمد اشرف غني د چاپېریال ساتنې ملي ادارې د برنامو او کړنو راپور واورېد
د افغانستان د اسلامي جمهوریت جمهور رئیس محمداشرف غني پرون ماښام چهارشنبه د ۱۳۹۹ کال د لیندۍ په ۵مه نېټه، د ویډیو کنفرانس له لارې د چاپېریال ساتنې ملي ادارې د برنامو، اجرااتو او فعالیتونو راپور واورېد.
د ویډیو کنفرانس په پیل کې د چاپېریال ساتنې ملي ادارې عمومي رئیس شاه زمان میوندي د دې ادارې د مهمو لاسته راوړنو او فعالیتونو په هکله لنډ راپور وړاندې کړ او له ولسمشر نه یې مننه وکړه چې چاپېریالي موضوعاتو ته پاملرنه کوي.
ورپسې د چاپېریال ساتنې ملي ادارې د پالیسۍ او نړۍوالو اړیکو پخواني معین ادریس ملیار چې اوس یې استعفا منظور شوې، د نړۍوالو همکاریو خاصتاَ له اقلیمزرغونصندوق څخه د مرستو د راجذبولو په تړاو راپور وړاندې کړ، ولسمشر هم د نړۍوالو مرستو د راجذبولو په تړاو د ښاغلي ملیار هڅې وستایلې.
د ويډیو کنفرانس په لړ کې د اوزون دفتر مسوول احمد صمیم هوشمند د ملي پلي کوونکي بنسټ د جواز ترلاسه کولو د پرمختګ په اړه چې د کلیو، بیارغونې او پراختیا وزارت او د افغانستان برېښنا شرکت لخوا په ګډه د اقلیم زرغون صندوق څخه ترلاسه کیږي، لنډ راپور وړاندې کړ.
ورپسې د دې ادارې د مالي او اداري چارو معین محمد یوسف حمیدیان په مالي او اداري برخو کې د دې ادارې د مهمو لاسته راوړنو په هکله ولسمشر ته راپور وړاندې کړ او د تدارکاتي څانګې اصلاح او د بشري سرچینو د ظرفیت لوړوالی یې په مالي او اداري برخه کې د چاپيریال ساتنې ملي ادارې له مهمو لاسته راوړنو څخه یاد کړل.
د کنفرانس په لړ کې د دې ادارې مسلکي معین انجنیرعزت الله صدیقي د مسلکي څانګې د لاسته راوړنو او فعالیتونو په تړاو معلومات وړاندې کړل او د اجراآتو په هکله یې جلالتمآب جمهور رئیس ته راپور ورکړ. ښاغلي صدیقي د څو سیمو اعلان د ساتل شوو سیمو په توګه، د چاپېریال چارو د څارنې لړۍ تیز والی، د جوازونو د ورکړې سیسټم اصلاح او بدلون، د چاپېریالي فعالیتونو لپاره د حقوقي چوکاټ جوړول له مهمو لاسته راوړنو څخه یاد کړل.
د چاپېریال ساتنې ملي ادارې د مشرتابه د راپور له اورېدو وروسته جلالتمآب جمهور رئیس ډاکټر محمد اشرف غني وویل: چاپېریال ساتنه د حکومت له لومړیتوبونو څخه ده او دې برخې ته باید د نړۍوالې ټولنې په همکارۍ د پروژیي لیدلوري څخه د برنامو د پلي کیدو پر لور ګام واخلو.
ولسمشر د چاپېریال ساتنې ملي ادارې څخه مننه وکړه چې له اقلیم زرغون صندوق او نورې نړۍوالې مرستې یې جذب کړي دي، ده وویل: موږ اوس د اقلیم زرغون صندوق د مرستو ترلاسه کولو او مصرف لپاره واضح نقشه لرو او په دې تړاو یې له چاپېریال ساتنې ملي ادارې مننه وکړه. نوموړي وویل: افغانستان د چاپېریالي وضعیت له نظره ۱۷ هېواد دی چې چاپېریال یې له ګواښ سره مخ دی؛ نو باید له اقلیمي بدلون سره د سازښت او مبارزې په برخه کې سترې برنامې جوړې شي.
جلالتمآب جمهور رئیس وویل: چاپېریال ساتنه د هېواد له مهمو سکتورونو څخه ده او لارښوونه یې وکړه چې د هواککړتیا د مخنیوي لپاره باید له موجودو نړۍوالو منابعو څخه کار واخیستل شي او چاپېریالي طرحې او برنامې دې ورته جوړې شي؛ همدا راز د ځنګلونو د ساتنې او جوړولو، نیالګیو کېنولو، د اوبو د مدیریت او ټولو چاپېریالي برخو باندې باید تمرکز وشي او په دې برخه کې باید مهمو برنامې ولرو.
جلالتمآب ولسمشر مننه وکړه چې د چاپېریال ساتنې ملي اداره کې خوځښت رامنځته شوی ده وویل: ډیر کار ته اړتیا ده چې دغه خوځښت لا غښتلی شي. ده لارښوونه وکړه چې د چاپېریال ساتنې ملي اداره باید په مرکز او ولایتونو کې له ښارولیو سره همغږي ولري؛ ترڅو وکولای شو د چاپېریال ساتنې لپاره ډیر کار وکړو او د مختلفو طبیعي ګواښونو لکه د وچکالۍ لپاره باید روښانه لیدلوری ولرو.
ښاغلي ولسمشر د خپلو خبرو په پای کې د دې ادارې د پالیسۍ او نړۍوالو اړیکو پخوانې معین ادریس ملیار کړنې وستایلې او د ده لپاره په کړنو د لابریا غوښتنه وکړه.