وروستی
غرنی پړانګ
غرنی پړانګ یو ښکلی او خورا مهم وحشي ژوی دی چې د سمندر له کچې څخه له (۳۰۰۰ تر ۵۰۰۰) مترو پورې لوړو او نیمه لوړو غرونو چې په ډبرو، وښو او شنو بوټو پوښل شوي وي؛ اوسیږي.
د دې ژوي شتون د بدخشان ولايت په واخان ملي پارک کې ثبت شوی، داسې انګيرل کيږي چې غرنی پړانګ په پنجشير، لغمان او نورستان ولایتونو کې هم شتون لري.
دا ژوی د ایکولوژیکي پلوه له خورا ارزښت څخه برخمن دی چې په خپل شتون سره يې د واخان د ځایي اوسيدونکو لپاره د څښاک او کرنې اوبه چمتو کړې دي او په غذایي ځنځير کې مهمه ونډه ترسره کوي.
وحشي ژوي د ایکوسیستم په ساتنه کې خورا با ارزښته رول لوبوي، د ایکوسیستم د انډول په ساتنه کې یې شتون هم حیاتي دی. الله تعالی چې دا ستر کائنات او مخلوقات پيدا کړي د هر یوه په پیدایښت کې ډیر زیات حکمتونه نغښتي دي، په کوم ایکوسیستم کې چې غرنی پړانګ اوسیږي هلته مارکوپولو پسونه، مغلي وزې، هوسۍ او نور ژوي هم ژوند کوي، که غرنی پړانګ نه وي کیدی شي چې د هوسیو یا نورو بوټو خوړونکو ژوو شمېر ډیر شي او هغه بوټي وخوري چې خاوره یې ساتلې، اوبه جذبوي او د سېلابونو مخنیوی کوي؛ نو که د غرنیو پړانګانو نسل له منځه لاړ شي او هغه ایکوسیستم چې یاد ژوي پکې ژوند کوي؛ بوټي او شنې ساحې به یې له منځه لاړې شي، اوبه به هلته نه زیرمه کیږي او په طبیعت کې به ډیرې نورې ستونزې پیدا شي.
غرنی پړانګ له ګواښ سره مخ ژوو په لیست کې دی او ښکار یې په کلکه بند دی.