په ننګرهار کې د اقلیمي بدلون نړۍواله اونۍ ولمانځل شوه

۱۴۴۵کال د ربیع الاول ۲۷مه / ننګرهار
د ننګرهار ولایت د چاپیریال ساتنې ریاست د REHA )د پياوړتيا لوړلو، چاپېريال ساتنې او بشري مرستو( موسسې په تخنیکي همکارۍ د ننګرهار سپینې ماڼۍ د غوڼدو په تالار کې د اقلیمي بدلون نړیواله اونۍ ولمانځله.
په دې لمانځغونډه کې د ولایت مقام، دولتي ادراو او نړیوالو مؤسسو مسوولینو؛ دولتي او خصوصي پوهنتونونو استادانو، د خصوصي سکتور استازو او محصلینو ګډون کړی وو.
غونډه د قرآن عظیم الشان مبارکو آیاتونو په تلاوت پیل  او ورپسې د ننګرهار ولایت مقام استازي د ګډونوالو هرکلی وکړ او د اقلیمي بدلون سره د ‌مبارزې او سازګارۍ په اړه یې مفصلی خبرې وکړې. 

په ختيځ زون کې د یونما استازې آغلې کارن کو آتس د اقلیمي بدلون په برخه کې د خپلو فعالیتونو په هکله رڼا واچوله چې په وینا یې د نورو هېوادونو د صنعتي فعالیتونو له امله په افغانستان کې د اقلیمي بدلون ګواښونو کچه لوړه شوې او منفي اغېزې یې نن افغانان ګوري، یوناما هڅه کوي چې د اقليمي بدلون ناوړه اغېزو د کچې ټيټولو په پرخه کې خپلې هڅې لا ګړندۍ کړي، نوموړې خوښي وښوده چې د اسلامي امارت چارواکي له مونږ سره د اقليمي بدلون د ناوړه اغیزو د کچې راټيټولو په برخه کې همکاري کوي.

 ورپسې د (REHA) موسسې مرستیال انجینر عزت الله صدیقي د اقليمي بدلون د اثراتو ارزونې په اړه معلوماتی پرزینتیشن ارایه کړ.
د چاپېرپال ساتنې ملي ادارې د اقليم بدلون سره د سازښت آمر انجنیر محب الله بهار د چاپېريال ساتنې ملي ادارې په استازولۍ پر خپلو فعالیتونو رڼا واچوله او په وینا يې د سیاسي وضیعت د خرابوالي په اساس ۳۲ پروژې چې د چاپېریال ساتنې په برخه کې یې فعالیتونه درلودل اوس بند شوي دي، د اړوند ارګانونو سره ناستې تر سره شوي چې اوسمهال دوه پروژې بېرته فعالې شوي او د نورو اقلیمي پروژو د فعالیت لپاره هڅه کوو چې حل لاره ورته پیدا کړو.
د ننګرهار ولایت د چاپېریال ساتنې رئیس فېروز محمدزئي په یادو برخو کې ترسره شوو فعالیتونو باندې رڼا واچوله او له اړوندو دولتي او غیر دولتي اداراتو څخه یې په یاده برخه د لا همغږۍ، همکارۍ او د بنسټیزو پروژو د پیل غوښتنه وکړه او همدارنګه په نړیوالو یې غږ وکړ چې په افغانستان کې د چاپېریال ساتنې په برخه کې دې خپل فعالیتونو بېرته پیل کړي او د چاپېریال ساتنې ملي ادارې سره دې په همغږۍ‎ ګډ کار وکړي.

د‌ غونډې‌ په‌ درېیمه برخه کې د‌ موضوع په اړه ټولو ګډونوالو هر اړخيز بحثونه وکړل او د ننګرهار ولایت په سطحه یې د اقلیمي بدلون د اثراتو او مشکلاتو چې په صحت، زراعت او مالدارۍ، د ځمکې لاندې د اوبو سطحې ټیټیدل، د ځنګلونو وهل، د صنعتي فعالیتونو ډېریدل، د طبيعي منابعو استخراج، ټولنیزې ستونزې، غیر پلاني ښارې پراختیا او داسې نورو شته ستونزو او د‌ هغو د حل په موخه خپل نظرونه شريک کړل او هیله یې وښوده چې په یاده برخه کې بنسټیزې پروژې پلې شي.
د اطلاعاتو او کلتور ریاست د اطلاعاتو آمر مولوي صدیق الله قریشي په اوس وخت کې د اقلیمي بدلون په تړاو د رسنیو په اهمیت خبرې وکړې، ویې ویل؛ زموږ ریاست کولای شي د چاپېریال ساتنې ریاست او اړوند موسساتو په همغږۍ د اطلاعاتو، فرهنګ او ځوانانو برخو کې د اقلیمي بدلون په اړه ډېرې ګټورې برنامې په لاره واچوي، چې د دولتي او خصوصي رسنیو له لارې به ټولو ولسونو ته د عامه پوهاوي په برخه کې ډېر موثر تمام شي.
د غوڼدې په پای کی د ننګرهار ولایت د چاپېریال ساتنې رئيس د ګډونوالو سوالونو ته ځوابونه ورکړل او غونډه په دعایې سره پای ته ورسېده.

Oct 14, 2023