وروستی
د چاپېریال ساتنې ملي ادارې له خوا د اقليمي بدلون نړيواله اونۍ ولمانځل شوه
د چاپېريال ساتنې ملي ادارې عمومي رئيس، شاه زمان میوندي په مشرۍ، د اقليمي بدلون نړيواله اونۍ د شاندارو مراسمو په ترڅ کې د تلې په ۲۹ نېټه، د استاد رباني د ښوونې او روزنې پوهنتون په اډيتوريم کې ولمانځل شوه. په دغو مراسمو کې د طبيعي پېښو په چارو کې د دولت وزير نجيب آقا فهيم، د چاپېریال ساتنې ملي ادارې معینانو، د ښځو چارو وزارت معينې آغلې نبيلې مصلح، د اړوندو وزارتونو معينانو، د استاد رباني د ښوونې او روزنې پوهنتون رئيس، پوهنمل ډاکتر ذبيح الله اسدي او محصلينو ګډون کړی وو. ښاغلي ميوندي د دې غونډې موخه د اقليمي بدلون موضوعاتو ته د اکاډميک سکتور هڅول وګڼل او ويې ويل: که غواړو چې د اقليمي بدلون سره د مبارزې پر وړاندې بريالي شو؛ نو اړتيا ده چې زرغون جهاد د ټولنې په یو موټی کولو سره ترسره کړو؛ ترڅو په راتلونکي کې له اقليمي بدلون سره سازګار افغانستان ولرو. نوموړي همدا راز د اقليمي بدلون له امله هېواد ته د اوښتو زيانونو او په نړۍ کې د لاسته راغلو فرصتونو څخه ګټې اخيستنې ته په اشارې وويل: افغانستان د اقليمي بدلون په راوستلو کې رول نه لري، خو د نړۍ تر ټولو زيان منونکی هېواد دی چې له نېکه مرغه د اقليمي بدلون سره د مبارزې لپاره نړيوال فرصتونه شته. د زرغون اقليم مالي صندوق (GCF) يې يوه بېلګه ده چې د اړوندو ادارو د ظرفيت او همکارۍ په لرلو سره کولای شو له هغو څخه د پروژو د پلي کېدو لپاره مالي مرستې تر لاسه کړو. ښاغلي ميوندي د تېر کال وچکالي او سږني سېلابونه هغه زيانونه وګڼل چې افغانستان د اقليمي بدلون په ترڅ کې ترې زيانمن شوی دی. نوموړي وويل: لږ اقلیمي بدلون تر ټولو سخته ضربه زموږ ټولنې ته را اړوي او اړتيا ده چې د اقليمي بدلون سره د سازښت ظرفيت لوړ شي. ښاغلي ميوندي د خپلو خبرو په ترڅ کې وویل: د افغانستان دولت په ۲۰۱۵ کال کې د ملګرو ملتونو د اقليمي بدلون کنوانسيون ته د خپل ملي مشخص سهم (NDC) راپور سپارلی دی. په دې راپور کې د افغانستان زيان منلو ته په کتو له ۲۰۲۰ کال څخه تر ۲۰۳۰ پورې د اقليمي بدلون سره سازښت لپاره 17.4 ملياردو ډالرو ته اړتيا ده او د دې پيسو د ترلاسه کولو لپاره د ټولو سکتورونو همکاري اړینه ده. د چاپېريال ساتنې ملي ادارې عمومي رئيس د ټولنې له اقشارو او په ځانګړي ډول له اکاډميکو بنسټونو او محصلينوڅخه وغوښتل چې د اقليمي بدلون په موضوع کې برخه واخلي او د طرحو، څېړنو او برنامو په وړاندې کولو سره دې له دې ادارې سره همکاري وکړي. ورپسې د طبيعي پېښو په چارو کې د دولت وزير نجيب آقا فهيم د چاپېريال ساتنې ملي ادارې څخه په مننې سره د اقليمي بدلون په مختلفو ابعادو کې د دا ډول برنامو ترسره کول يو لوی حرکت وګڼه او ويې ويل: د اقليمي بدلون سره د مبارزې لپاره ملي هوډ او ګډون ته اړتيا ده. که د دې ګواښ پر وړاندې سره يوځای نه شو؛ نو د ډېرو نورو ستونزو سره به مخ شو. ښاغلي فهيم له ټولو ځوانانو او محصلينو څخه وغوښتل چې د خپلو مونوګرافونو په چمتو کولو کې دې د اقليمي بدلون او شته نړيوال کنوانسينونه په پام کې ونيسي. له ده وروسته د استاد رباني د ښوونې او روزنې پوهنتون رئيس پوهنمل ذبيح الله اسدي د اقليمي بدلون سره د مبارزې په برخه کې د اکاډميکو بنسټونو دخيلېدل يوه ګټوره کړنلاره وبلله او ويې ويل: دا د ټولنې د ټولو اشخاصو رسالت دی چې د چاپېريال په ساتنه او له اقليمي بدلون سره د سازښت لپاره هڅې وکړي. د ښځو چارو وزارت معينې آغلې نبيلې مصلح د اقليمي بدلون په موضوعاتو کې د ښځو ګډون مهم وباله او د عامه پوهاوي د کچې پر لوړېدو يې ټينګار وکړ. د غونډې په پای د کليو بيارغاونې او پراختيا وزارت مشاورې آغلې ناجيه خروټې، چې د چاپېريال ساتنې په برخه کې يې نه ستړې کېدونکې هڅې کړي دي، د چاپېريال ساتنې ملي ادارې لخوا وستايل شوه. د يادونې وړ ده چې د خلکو د عامه پوهاوي د کچې د لوړېدو او اقليمي بدلون نړيوالې اونۍ په ترڅ کې د اکاډميکو بنسټونو د دخيلېدو په موخه په بلخ، هرات، ننګرهار، خوست، لوګر، جوزجان او نورو ولايتونو کې هم دې ته ورته غونډې ترسره شوې دي.