وروستی
ننګرهار پوهنتون کې د اقلیمي بدلون په هکله جوړیدونکي نړیوال کنفرانس په تړاو مطبوعاتي کنفرانس ترسره شو
۱۴۴۵کال د رجب۲۴مه/ کابل
د چاپېریال ساتنې ملي ادارې او لوړو زده کړو وزارت له خوا ننګرهار پوهنتون کې د
اقلیمي بدلون په هکله جوړیدونکي نړیوال کنفرانس د جزیاتو او معلوماتو د شریکولو په
هکله نن دوشنبه د ۱۴۰۲کال د سلواغې په ۱۶مه نېټه د حکومت د اطلاعاتو او رسنیو په
مرکز کې مطبوعاتي کنفرانس ترسره کړ.
د چاپېریال ساتنې ملي ادارې د مالي او اداري چارو معین مولوي عبدالسلام حقاني ننګرهار
پوهنتون کې د اقلیمي بدلون په هکله جوړیدونکی نړیوال کنفرانس باارزښته وباله او هیله
یې وښوده چې له پایلو څخه به د پالیسیو په جوړولو کې ترې اعظمي ګټه پورته کړي. ده
زیاته کړه: اوسمهال اقلیمي بدلون یوه ملي او نړیواله موضوع ده چې د ناوړه اغېزو څخه
یې د ځنګلونو، وحشي ژوو، ژوند بڼو، نباتاتو او انسانانو سربېره هر ساکښ اغیزمن دی.
ښاغلي حقاني وویل: د اقليمي بدلون له امله افغانستان تر ټولو اغیزمن هېواد دی په
داسې حال کې چې د اقلیمي بدلون په رامنځته کیدو کې هیڅ ونډه نه لري.
نوموړي پر نړیوالو غږ وکړ چې چاپېریالي موضوعات سیاسي نه کړي؛ ځګه د اقلیمي بدلون
د ناوړه اغیزو څخه تر ټولو زیانمن خلک بشري ټولنې دي او دا د افغانستان حق دی چې
مخ پر ودې هېوادونه افغانستان ته د اقلیمي بدلون د ناوړه پایلو غرامت ورکړي.
ښاغلي حقاني وویل: د افغانستان اسلامي امارت دې ته ژمن دی چې د خپل ملت د ساتنې او
هوساینې لپاره له اقلیمي بدلون سره د مبارزې په برخه کې لازم اقدامات ترسره کړي.
ده د لوړو زده کړو وزرات او ننګرهار پوهنتون له دې نوښت څخه چې په یوه مهمه موضوع یې
نړیوال کنفرانس جوړ کړی مننه او قدردانی وکړ.
|د لوړو زده کړو وزارت علمي معین دوکتور لطف الله خیرخواه د یاد کنفرانس د جوړیدو په هکله هر اړخیز معلومات وړاندې کړل او زیاته یې کړه: راتلونکې اونۍ به ننګرهار پوهنتون کې د اقلیمي بدلون په تړاو نړیوال کنفرانس جوړ شي چې د اسلامي امارت لوړپوړي چارواکي، د کورنیو او بهرنیو پوهنتونونو استادان او متخصصین به پکې په حضوري او انلاین بڼه ګډون وکړي.
ښاغلي خیرخواه اقلیمي بدلون یوه حیاتي او د افغانستان په ملي قضایاوو کې شامله
موضوع وبلله او دا یې د علمي بنسټونو مکلفیت وباله چې د علمي څېړنو په پایله کې
اهم موضوعات را برسیره او خلک یې د عواقبو خبر کړي.
په دې کنفرانس کې به په ملي او نړیواله کچه د پوهنتونونو استادان او متخصصین برخه
واخلي او خپلې څېړنې به له ګډونوالو سره شریکې کړې. تر اوسه ۲۵۰ علمي مقالې شریکې
شوې چې له دې جملې څخه ۱۴۰ مقالې او څېړنې منل شوې دي چې تر هر اړخیز بحث وروسته
به افغانستان کې له اقلیمي بدلون سره د
سازښت او مبارزې په برخه کې د پالیسیو او ستراتیژیو په جوړولو کې ترې کار واخیستل
شي.
د کنفرانس په وروستیو کي د خبریالانو پوښتنو ته د اړونده مسؤلینو له لوري ځوابونه وویل شوه.