وروستی
د کابل هوا د ککړتيا د لاملونو د مبارزې په موخه د کابل د ارغندي او پغمان سيمو څخه د رېګرېشنونو د فعاليت د تړل کېدو او اخراجېدو لړۍ پيل شوه
د هوا ککړتيا پر وړاندې د مبارزې په دوام نن ( يک شنبه، د جدي ۱۵مه ) د چاپېريال ساتنې ملي ادارې عمومي رئيس شاه زمان ميوندي په مشرۍ لوړپوړي پلاوي چې پکې د چاپېريال ساتنې ملي ادارې مسلکي معين انجينير عزت الله صديقي، د کابل ښاروالۍ د ښاري خدمتونو معينې آغلې ډاکتر مهتاب عالمي او د کورنيو چارو او د کانونو وزراتونو استازو هم ګډون درلود د کابل پغمان ولسوالۍ او ارغندۍ سيمو څخه يې د ساختماني موادو د توليدي شرکتونو د اخراج لړۍ پيل کړه.
دا دستګاوې چې پکې رېګرېشنونه، د خښتو بټۍ او د ګچو د توليد دستګاوې شاملې دي، د دود او سمي ګازونو د توليد اصلي لامل ګڼل کېږي چې د هوا او چاپېريال لپاره خطرناک بلل کېږي.
په دې دستګاوو کې د رېګ جوړونې ۱۹ کارخانې، د خښتو ۱۳ بټۍ او د ګچو د توليد ۳۳ توليدي کارخانې شاملې دي، چې د اخراج او يا هم د فعاليت د درېدو کار يې پيل شو.
د چاپېريال ساتنې ملي ادارې عمومي رئيس شاه زمان ميوندي له سيمې څخه د ليدنې او د دې شرکتونو د اخراج دستور د صادرېدو پر مهال خبريالانو او رسنيو ته وويل، چې د جلالتماب ولسمشر په مشرۍ د افغانستان اسلامي جمهوري دولت او د چاپېريال ساتنې ملي ادارې رهبري د هوا ککړتيا د عواملو سره د مبارزې په پار په جدي ډول مصممه ده او له ټولو ادارو، بنسټونو او مختلفو اشخاصو سره به جدي او قانوني چلند وشي.
د چاپېريال ساتنې ملي ادارې عمومي رئيس د خپلو خبرو په ترڅ کې وويل: د دې شرکتونو او متصديو د بديلو سيمو لپاره د ذيربطو دولتي ادارو ترمنځ خبرې اترې روانې دي او د کانونو وزارت به په دې برخه کې وروستی تصميم د دې شرکتونو له مالکانو سره شريک کړي.
ښاغلي ميوندي ټينګار وکړ، چې د ولسمشرۍ عالي مقام د حکم پر اساس د هوا ککړتيا سره مبارزه د دولت رهبرۍ په لومړيتوبونو کې ده او د پلازمېنې د هوا ککړتيا د لاملونو د بشپړې ختمېدو په پار به لنډمهاله او اوږدمهاله تدابير په بشپړ قوت او جديت سره دوام ولري.
د چاپېريال ساتنې عمومي رئيس د خپلو خبر په لړ کې وويل: دمګړی د چاپېريال ساتنې ملي ادارې نظارتي ټيمونه د کابل ښار له ټولو سيمو، تصديو، او ښارګوټو څخه په جدي او دوامداره ډول نظارت کوي او د خبرتياوو او لارښوونو د نه پام نيولو په صورت کې به د قانون او کړنلارو مطابق چلند سره مخامخ شي.
ښاغلي ميوندي له ټولو رسنيو او او خبريالانو څخه مننه وکړه، چې تل يې دې ادارې سره د هوا ککړتيا پر وړاندې د مبارزې په تړاو د ټولو تصميمونو او د دولت برنامو د خپرولو په برخو کې همکاري کړې ده.
د چاپېريال ساتنې ملي ادارې عمومي رئيس د هوا ککړتيا پر وړاندې مبارزه يې د ټولو مسووليت وګڼه او له ټولو ښاريانو، رسنيو او دولتي او غير دولتي بنسټونو څخه يې وغوښتل چې په دې برخه کې خپلې همکارۍ ونه سپموي.
ويل کېږي چې، د دې برنامې په دوام سبا (دوشنبه، د جدي ۱۶مه) په پام کې ده چې، د چاپېريال ساتنې ملي ادارې له لوري د بې کيفيته تېلو پمپ سټېشنونه وتړل شي.
همدارنګه د چاپېريال ساتنې ملي ادارې نظارتي ټیمونو نن (يکشنبه، د جدي ۱۵مه) ۱۴ مختلف فعاليتونه د کابل په مختلفو سيمو کې ترسره کړل، چې پکې د نظارت، تړل کېدو او د تړل کېدو د بيا پرانيستو فعاليتونه شامل و.
د کابل ښار په مختلفو اصنافو کې ۱۵ لوړ پوړيزې ودانۍ او لس حمامونه و ارزول شول، چې له ډلې څخه يې د ۹ لوړپوړيزو ودانيو د مرکز ګرمۍ سيستمونه او يو حمام د هوا ککړتيا سره د مخنيوي لازمو تدابيرو د نه نيولو (د فلتر کوونکو دستګاوو د نه نصبولو) په پار وتړل شول او د ګلبهار ښارګوټي د مرکز ګرمۍ سيستم بېرته پرانېستل شو. د يادونې وړ ده چې د کابل ښار مختلفو سيمو څخه د نظارتي ټيمونو له لوري په جدي ډول نظارت دوام لري او د سرغړوونکو سره سره به جدي او اصولي چلند وشي.