وروستی
ملت ته د چاپېریال ساتنې ملي ادارې د رهبرۍ د راپور ورکولو کنفرانس تر سره شو
کابل- د کب ۱۴مه
دوهمه برخه:
ملت ته د چاپېریال ساتنې ملي ادارې د رهبرۍ د راپور ورکولو د کنفرانس په دویمه برخه کې د دې ادارې مالي او اداري معین محمد یوسف حمیدیان ، مسلکي معین انجنیر عزت الله صديقي او د نړیوالو اړیکو معین ادریس ملیار د ۱۳۹۸یم کال په اوږدو کې د دې ادارې د لاسته راوړنو په اړه خبرنګارانو او د دغه کنفرانس ګډونوالو ته معلومات ورکړل.
په پیل کې محمد یوسف حمیدیان په ۱۳۹۸ یم کال کې د چاپیریال ساتنې ملي ادارې د تشکیلاتي او مالي مسایلو په اړه خبرې وکړې او زیاته یې کړه: په روان کال کې د مالي او بشري سرچېنو وضعیت ته په کتو سره، ۱۱۵خالي بستونه ازادې سیالۍ ته وړاندې کړل شول، چې د نویو ګمارل شویو کسانو له ګمارنې سره سم، د ښځو ونډه هم لس سلنه لوړه شوې ده.
ښاغلي حمیدین وویل: د لومړي ځل لپاره دغې ادارې وکولای شول، چې خپله پراختیايي بودیجه ۹۰سلنه او عادي بودیجه تر۹۵ سلنو پورې و کاروي، چې ډیری یې د ادارې جوړنې، د معلوماتي تکنالوژۍ د سیستم پر چمتو کولو، د لابراتواري تجهیزاتو په برابرولو او د خلکو د عامه پوهاوي د لوړولو په برخه کې لګولې ده.
ورپسې د چاپېریال ساتنې ملي ادارې مسلکي معین انجنیر عزت الله صدیقي، د دې ادارې د مهمو اقداماتو او لاسته راوړنو، بالخصوص د هوا ککړتیا د رامنځته کوونکو منابعو، د لوړپوړیزه ودانیو او ښارګوټو د سون له سیستم څخه څارنه، د هوا ککړتیا د مخنیوي او راکمولو لپاره د پنځه کلن پلان چمتو کول، د هوا ککړتیا په برخه کې له جمهوري ریاست مقام څخه د احکامو تر لاسه کوونه او پلي کول، د اوبو او هوا څارنه، د طبعیي میراثونو ساتنه، د وحشي ژویو او ساتل شویو سیمو، د چاپېریالي جوازونو صادرولو او د اقلیمي بدلون پر ستونزو خبرې وکړې.
ښاغلي صديقي د دې ادارې د راتلونکو پلانونو په اړه زياته وویل: د اوبو د کیفیت او څارنې په اړه د بیولوژیکي مطالعاتو پر چمتو کوونه کار، د ډبرو سکرو سالم مدیریت، د اصنافو، ښارګوټو او لوړپوړیزه ودانیو د سون سیستمونو بدلون، د لوګي فلترونو واردات او په هېواد د ننه کې جوړونه، د سطحي او تر ځمکه لاندې اوبو سروې، د چاپېریالي جوازونو صادرول او د هېواد د لس فیصده ساتلو شویو سیمو اعلانول او تر څنګ یې نور مهم چاپېریالي موضوعات د جریان په حالت کې دي.
ورپسې د چاپېریال ساتنې ملي ادارې د پالیسۍ او نړیوالو اړیکو معین ادریس ملیار د نړیوالو مالي او تخنیکي مرستو د راجلبولو پر میکانیزمونو په تېره بیا د زرغون اقلیم صندوق، اړوندو ادارو ته د زرغون اقلیم مالي صندوق په برخه کې د پروژو په ورکړه کې د اسانتیا رامنځته کول، د پلي کونکې ملي ادارې رامنځته کول، کنوانیسونونو ته د راپور لېږدول، په چاپېریالي قانون او مقرراتو کې بدلون، د څو اړخیزه ژمنو د پلي کېدو د پلان پر ستراتیژۍ، د اوبو د کیفیت له ساتنې د پالیسۍ او د اوزون پر لایه خبرې وکړې.
ښاغلي ملیار زیاته کړه، چې د تېر یوه کال په اوږدو کې له نړیوالو د مالي مرستو په جذبولو، د چاپېریالي پالیسۍ جوړونه، د اوبو کیفیت پالیسي، له جمهوري تاجکستان سره د تفاهمنامې د مسودې چمتوکول او د چاپېریال ساتنې ملي ادارې او نړیوالو سازمانونو تر منځ د همکاریو پراختیا له اړینو اقداماتو شمارل کېږي، چې د پالیسۍ جوړونې او نړیوالو اړیکو په برخه کې په لاس کې دي.
هېره دې نه وي چې د دغه کنفرانس په پای کې د چاپېریال ساتنې ملي ادارې مشرتابه، د خبرنګارانو او ګډونوالو پوښتنو ته ځوابونه ورکړل.