په ټولنیزو رسنیو (ټویټر او فیسبوک) کې یوه ویډیو خپره شوې چې پکې څو دانې غرڅه په ډېرې بې رحمۍ سره د یوه تن لخوا ښکار کیږي، د ټولنیزو رسنیو ځینو استفاده کوونکو یاده ویډیو د فراه ولایت پورې منسوبه کړې ده.
د چاپېریال ساتنې ملي اداره د یادې موضوع د پلټنې په موخه ژر لاس په کار شوه او دغه موضوع یې د فراه ولایت د چاپېریال ساتنې ریاست سره شریکه کړه.
د جمهوري ریاست د فرمان په اساس په قطعي ډول ښکار بند دی او څوک چې دا کار وکړي د هېواد د نافذه قوانیونو پر اساس مجرم بلل کیږي.
د چاپېریال ساتنې ملي اداره به له ټولو هغو سرغړوونکو سره چې د ژوند بڼو او وحشي ژویو ته زیان رسوي او همدا راز چاپېریالي جرمونه کوي، جدي قانوني چلند کوي.
که دا ثابته شي چې په فراه ولایت کې غرڅه ښکار شوي دي؛ نو د دغه ناوړه عمل لاملین به د قانون منګولو ته وسپارل شي.
موږ د یادې پېښې په تړاو د فراه ولایت له محلي چارواکو سره پلټنه کوو؛ ترڅو ژر ترژره حقیقت پیدا کړو.
د چاپېریال ساتنې ملي اداره د ژوند بڼو ساتنې ته ژمنه ده او ټولو قانون ماتوونکو ته به سزا ورکوي.